BB濕疹護理及產品分享




Hello大家好!我嘅inbox每一日會有十多個message 問我如何幫Ezra解決他的濕疹問題,今日就一次過解答返 再同大家分享一d 我地試過嘅products嘅用後感吧!

首先要開始講一件好重要嘅事,就係:每 個 bb 都 唔 一 樣 !呢個真係非常重要的,就好似我地大人咁,用嘅護膚品同化妝品都會有唔同嘅效果反應,bb都係!所以今次嘅分享只係分享我地嘅experience, 我自己並不是什麼皮膚科專家, 亦是first time mom 沒有過往經驗。只想同大家講聲,Ezra用嘅product好咗,並唔代表喺其他bb身上都一樣喔!

Ezra - 3-4 weeks old

首先講下Ezra嘅皮膚狀況。佢三週大嘅時候開始有奶癬。奶癬同濕疹有咩分別呢?醫生同我地講話奶癬通常只生喺臉部,大小小就會退,而濕疹就會spread到身上,特別係喺摺位同埋跤位(譬如膝蓋後)。濕疹就有機會係遺傳,有d小朋友容易斷尾,但係有d小朋友到長大後都依然會繼續有濕疹呢個問題。


Ezra的奶癬問題,我地當時就係搽瑞士寶寶 (see below)。因為當時係冬天,瑞士寶寶係比較保濕 所以我地就密密搽,一個月後就已經改善了。
初期我亦都因為餵母乳關係有戒口  
避免吃燥熱同奶製品的食物 不過並沒見到戒口對佢皮膚有咩即時嘅改善(而兩位醫生亦同我講話與進食無關)。


喺Ezra大約三個月大嘅時候,濕疹就找上門了。呢個時候亦都係佢最辛苦 我亦都最心痛嘅一段時間。可能呢個時候亦都正正係轉天氣 開始潮濕嘅季節,所以濕疹特別嚴重。

一直都唔想帶佢睇醫生 因為個個都話醫生只會開類固醇,而大家一聽到類固醇呢三隻字就會好反感,因為擔心bb皮膚會依賴咗佢,亦都擔心佢會令bb皮膚更加薄。BB仲咁細,有邊個會想同佢搽有藥成分嘅產品呢?但係見到佢一日比一日痕,一日比一日焦躁 同辛苦,我就最終帶咗佢去睇醫生。

喺Review所有產品前,同大家分享我一d護理嘅心得先:

1. 轉奶粉品牌 (當時未做到全人奶)
本身Ezra飲開 Aptamil白金版, 經醫生介紹 轉咗 Nan Pro 1, 但由於沒見到好轉(雖然佢一日可能只係飲到一餐奶粉 所以最終其實覺得奶粉唔係好大影響),再轉 Aptamil Allecure 。 

2. 開冷氣 
Ezra的兒科醫生一開頭就已經講明話Ezra係冷氣BB,雖然冷氣會聯想到令皮膚乾燥,但太熱的話 Ezra不單只濕疹特別嚴重 亦都生埋熱痱,所以冇辦法之下 
太熱嘅時候要開冷氣比佢。

3. 勤力搽Cream
兒科醫生話最好每半小時就同佢補搽 cream. 不過Ezra嘅皮膚乾到甩皮,搽完cream唔夠兩分鐘就已經吸收曬 好快乾返,所以我當時係每10-15分鐘會幫佢補搽cream。特別係開咗冷氣 要更加勤力 搽得更加密。我覺得呢個係十分重要,亦見到效果 所以當時我都咩都唔做,一路standby 就係幫佢搽cream。

4. 洗澡不要超過10分鐘 溫度不能太熱
沖涼都要特別小心,一來唔可以用soap嘅產品,溫度亦要調教到剛剛好37度 (不能太熱), 沖涼時間亦都唔可以太耐 但要確保清潔得乾淨。我亦都避免用毛巾去幫佢沖/擦身 因為怕會有摩擦,所以都係用手。
抹身嘅時候都唔會用毛巾去擦,輕輕印乾就ok。
我之前亦都有嘗試過用麥皮,母乳,金銀花等 幫佢沖涼,全部都沒有用。

5. 母乳媽媽可嘗試戒口
雖然醫生話戒口其實不是太大幫助 (兒科醫生及皮膚科都係咁話),不過我依然都有戒 (better safe than sorry). 主要係戒dairy, 海鮮,牛肉 。


6. 家居用品都選擇天然及不致敏的產品
衣服我會同佢著Cotton  甚至花多小小錢買Supima Cotton, 而洗衣液都選擇Hypoallergenic 同Fragrance Free (我們用的是 Attitude Little Ones). 
在家中也是常吸塵抹塵 盡量減少致敏源。

7. 帶手套
Ezra睡覺或者喺我地冇手去阻止佢抓面嘅時候(譬如餵奶)都會幫佢帶返手套避免佢自己抓面。雖然好多人唔建議BB帶手套,因為會阻礙佢嘅sensory stimulation, 但醫生都建議多帶手套 預防佢抓面抓到更加紅。BB會感受到皮膚痕癢,所以自己都會識得locate到邊度痕就會去抓。為了保護bb嘅敏感肌 不要讓bb去抓 (特別bb如果有吃手的習慣,口水都會容易transfer到皮膚上 而導致口水疹或令濕疹問題更嚴重)

8. 使用空氣清新機及調教室內相對濕度
我地日日都會開空氣清新機,並調教相對濕度到60%, 咁就確保唔會太潮濕或太乾燥。




首先同大家講講我地用咗 而覺得令Ezra皮膚有好轉的產品先。



Cetaphil Shampoo (high tolerance for sensitive scalp) (購自兒科診所)
一開始Ezra都有Cradle Cap (頭泥問題), 使用Cetaphil一段時間先見到有好轉。呢一隻比較溫和 唔會起泡同埋唔會刺激。

Mustela Stelatopia Cleansing Cream (購自永安)
我地試過好多唔同嘅沖涼用品都沒有太大幫助,唯獨係用咗Mustela呢一隻 先真係漸漸見到好轉 所以呢一隻我地回購完再回購。
佢係可以滋潤住佢皮膚 係no rinse (免清洗,反而清洗得太乾淨,會洗走咗佢嘅保護膜)

Mustela Stelatopia Bath Oil (購自永安)
呢個我地都覺得唔錯 可以沖涼時都滋潤住Ezra嘅皮膚(沖涼好容易令bb皮膚乾燥)



Bioderma Atoderm Intensive Baume (購自兒科診所)
兒科醫生度配的cream 呢個我地主要搽身(其實搽面都可以)。佢質地好水潤但係其實係balm texture, 非常滋潤同鎖水,呢一隻我地都係keep住回購完再回購。不過cream真係搽得好快同埋喺診所配好貴



Physiogel Lipid Balm (購自兒科診所)
呢個都係診所度先有得配. 同Bioderma差不多 不過我地只係搽面 (因為細支又貴)。搽完一樣會有一個好似保護膜咁 滋潤住佢皮膚。 



Swiss Naturalich 瑞士寶寶 Natural Baby Skin Care Cream (購自永安)
呢一隻就係Ezra一開始有奶癬同diaper rash會用的cream,覺得退diaper rash都非常好。不過呢只cream會比較澀同厚 同埋佢嘅顏色容易‘high’度落d衫度,我個人覺得適合冬天或者超乾肌使用,不過佢勝在天然同埋有效!


Ezra現在使用的沐浴產品



Ezra目前試過的沐浴產品:

Aveeno Baby Eczema Therapy (購自 iHerb)
雖然好多讀者有推介呢個比我地試,但係Ezra用呢個會敏感 濕疹問題更嚴重,
所以用了兩次沒有再用了。

Mustela Stelatopia Cleansing Gel (購自永安)
Ezra未出世的時候我已經買咗Mustela standard line比Ezra用,頭一個月都係用呢隻沖涼,一直覺得ok 幾清爽乾淨 味道都好香。不過到Ezra開始有濕疹我問題就冇再用 因為佢香料都幾重。 


給大家比較一下 Cleansing Gel同Cleansing Cream的質地, Cleansing Cream會比較上保濕d。



Oilatum Baby Bath Emolient (購自Watsons)
Ezra第一個兒科醫生推介的沐浴產品,用了一段時間 覺得一開頭都有舒緩下Ezra的皮膚,但係用咗兩個星期後 Ezra的皮膚問題越來越嚴重,所以覺得呢個後來都冇太大幫助 就轉用其他品牌。



解決頭泥問題,我亦都有用 Mustela Foam Shampoo for Newborns (購自永安)  Moogoo Natural Scalp Cream Moisturizer (購自Baby Central)
Mustela 我覺得冇太大幫助,而Moogoo 更令Ezra 頭皮更紅同痕 所以即時停止使用


Oilatum Baby Cream Emollient (購自 Watsons) 
Mustela Stelatopia Emollient Cream (購自永安)

Oilatum 係fail咗,而Mustela 呢一隻 Ezra皮膚穩定後 (我地之前冇曬Bioderma後 又未有機會去回購) 就keep住都有用 不夠Bioderma 及Physiogel保濕 但好適合依家炎熱的天氣,亦都keep到Ezra皮膚ok 
另外有幾隻cream我地試過都係fail的: 



California Baby Eczema Cream (購自Baby Central)
呢只cream個質地幾滋潤同埋好容易推開 用喺Ezra皮膚 第二日都見到有好轉,但慢慢用落 又變差返。佢嘅香味都幾strong,所以我覺得香料成分應該幾重 最後停止使用。


Moogoo Natural Soothing MSM Moisturiser (購自Baby Central)
同上面一樣,一開頭用都ok 慢慢又變差
有時候雖然有d產品標籤係natural, 但並不代表適合所有皮膚


以上 ALL FAIL

藥膏 

最後帶Ezra見一位兒科醫生,配咗 0.05% Hydrocortisone (比第一個醫生配的 1% Hydrocortisone更mild), 幫佢搽咗3-4日 (需要位置先搽), 就已經好得七七八八 而翻發都小咗好多。所以其實我反而後悔 冇早d同佢搽藥膏,因為可能早的治療  斷尾機會會快d 同埋冇咁容易翻發。不過當然,呢個係個人選擇。 


Before / After

之後我地都係需要時先搽(冇事冇幹唔會走去搽),一路都控制到濕疹 亦都慢慢變好
到依家 已經唔需要再搽呢一隻藥膏了。





之後,Ezra皮膚其實已經好了80% 但我地一早book咗皮膚科楊醫生(要等三個月先有得睇),反正book咗又等咗咁耐決定比Dr Yeung睇下Ezra皮膚嘅狀況。Dr Yeung話Ezra唔屬於好嚴重,大約一年左右應該都可以斷尾。因為當時Ezra嘅摺位 間唔中都會有小小紅同脫皮(不是紅點/疹 但都叫做濕疹),所以Dr Yeung開咗一隻藥膏 基本上係  Vaseline溝小小藥。佢話d藥係非常mild, 小朋友就算唔小心碰到放落口都安全的 。




呢一隻cream就真係好似vaseline嘅質地,喺果d脫皮嘅位置搽咗一日已經好返曬 所以我地基本上都冇乜需要再搽了。


宜家Ezra除咗有小小口水疹之外 (因為teething關係 流超多口水!),皮膚基本上變返滑嫩嫩,做媽咪嘅 終於可以放心 唔洗再咁心痛。我宜家亦都冇再戒口(一樣有吃好多海鮮牛肉 dairy, Ezra皮膚都一直沒事 證明佢嘅case同食物無關,
不過如果大家擔心的話 可以帶小朋友做食物敏感測試) 

知道好多媽媽會因為bb有濕疹 而好憂慮,想喺呢度同大家講聲加油!
呢度小小我地嘅經驗同大家分享,祝大家嘅bb 濕疹快d好返 ❤️ 





















3 comments

  1. Happy to see Ezra 變返滑嫩嫩baby :)
    咁有無另外再帶佢做食物敏感測試阿?

    ReplyDelete
  2. 請問係邊位楊醫生?我bb都有好嚴重嘅濕疹問題����

    ReplyDelete
  3. Hi Beth. Can you have an English version of this post? My daughter has bad eczema and I can’t find products that helps. Thanks for sharing!!
    And Ezra is so precious. He’s growing up so fast!

    ReplyDelete

© BETHNI.COM

This site uses cookies from Google to deliver its services - Click here for information.

Professional Blog Designs by pipdig